18 de decembro, 2018. O voceiro popular de Cervantes, Javier Santín, critica a falta de alumeado e decoración de Nadal no municipio a menos dunha semana de Noiteboa. “Cervantes debe ser o único concello da provincia sen unha mínima decoración ou iluminación que contribúa a xerar alegría entre os veciños nestas datas. Tampouco temos constancia da programación de actividades para este Nadal. Isto demostra, unha vez máis, o pasotismo e deixadez do alcalde debido á súa acomodación no Goberno local. A a súa falta de acción arrástranos a todos a vivir estas datas nun ambiente entristecido”, critica.
Santín explica que “non nos consta que dende o Concello se promova tampouco ningún tipo de programación de Nadal que contribúa a dinamizar a vida social dos veciños e veciñas nestas datas de xuntanzas e confraternidade. Mesmo nos últimos anos a Cabalgata de Reis foi organizada dende a ANPA do colexio”.
Pola contra, o popular considera que “debería ser o Concello o promotor de certas actividades de calado. Por iso lle esiximos que cumpra coas súas responsabilidades”.
Ausencia de actividades sociais e culturais
O voceiro do PP e candidato á alcaldía de Cervantes afirma que “este é o proceder dos últimos anos que se estende tamén a outros moitos asuntos relacionados co municipio. Por poñer un exemplo, o Goberno local socialista non se preocupa de xestionar nin organizar ningún tipo de actividade social ou cultural nin polo Nadal nin por outras datas. Nin sequera é capaz de preocuparse por algo tan sinxelo que podería reportar algo de alegría aos veciños e veciñas que sofren esta discriminación con respecto aos doutros concellos que disfrutan de decoración e programación de Nadal”, censura.
Finalmente, Santín lamenta que “Cervantes só sexa noticia por algún aspecto negativo coma a perda de servizos ou a falta de actividades para promover as relacións entre a veciñanza; mentres o alcalde mira para outro lado”, conclúe.