Santiago, 13 de xuño de 2007.- A Xunta de Galicia descoñece, a día de hoxe, o estado real dos recursos pesqueiros que resultan de interese para a flota pesqueira, segundo denunciou hoxe no Parlamento o voceiro de Pesca do Grupo Popular, José Manuel Balseiro, ao preguntar á conselleira do ramo polas razóns da parálise na que está inmerso o Comité Científico Galego da Pesca, que non se volveu reunir desde maio de 2005 e nin sequera elaborou o informe anual ao que está obrigado pola normativa autonómica.
Creado a través do decreto 24/2004, do 29 de xaneiro, o Comité Científico Galego da Pesca debe reunirse, polo menos, dúas veces ao ano, e, entre outras, ten a obriga de elaborar un informe anual sobre o estado dos recursos pesqueiros que resultan de interese para a flota galega.
A XUNTA IGNORA UN DECRETO QUE CONTINÚA EN VIGOR
Balseiro Orol recordou que o decreto continúa en vigor, e polo tanto, a Consellería incumpriu a súa obriga de convocar ao Consello e, o que resulta aínda máis grave, prescindiu dun informe fundamental para xestionar con eficacia os recursos mariños. Da parálise na que está inmerso o Comité Científico Galego da Pesca dedúcese, a xuízo dos populares galegos, que as escasas medidas que a Consellería de Pesca está a adoptar en relación coa conservación dos recursos adóptanse sen fundamento científico algún.
Insistiu o deputado popular en que “coñecer o punto de vista dos científicos sobre o estado dos recursos pesqueiros resulta fundamental para elaborar políticas pesqueiras viables e para evitar o caos que se ten instalado na Consellería que dirixe Carmen Gallego”.