Outeiro de Rei, 15 de setembro de 2012.- O Partido Popular de Lugo desenvolveu na tarde de hoxe en Outeiro de Rei un foro sobre o sector agrogandeiro que contou coa presenza de Rosa Quintana e José Manuel Barreiro, entre outros dirixentes populares, ademais dun importante número de profesionais do medio rural.
 |
No marco do mesmo os populares lucenses falaron especialmente sobre o sector produtor lácteo que cualificaron como estratéxico desde o punto de vista económico e social para Galicia, xa que dá sustento AA arredor de 60 mil persoas e 11 mil explotacións no conxunto da nosa Comunidade Autónoma, máis de 5.000 das cales se atopan na provincia de Lugo.
“É evidente que estamos a atravesar unha situación moi difícil pola baixa dos prezos e acrecentada pola diferenza inxustificada no valor do leite existente entre a nosa comunidade e outras comunidades autónomas, pero Galicia veu facendo os deberes ao longo destes tres anos e, da man do Ministerio, saberá pórlle solución a esta situación”- dixeron.
DISTINTAS MEDIDAS
Desde as administracións populares desenvolveron distintas medidas dirixidas a mellorar a competitividade como foron a ampliación da base territorial das explotacións e de mellora da eficiencia enerxética. Tamén buscaron achegar liquidez e mellorar a capacidade financeira das explotacións adiantando axudas e outorgando achegas en época de crise, e contribuíron a mellorar a estrutura comercial promovendo a diferenciación do noso leite e estruturando o sector produtivo de cara a entrada en vigor do “paquete lácteo”.
“Levamos oito meses de actividade conxunta co Ministerio e demandamos a posta en marcha dun paquete de medidas correctoras. Se ben non hai unha solución única, inmediata e de éxito, si poderemos conseguilo sumándoas todas”-explicaron os populares.
Nesa liña o foro agrogandeiro destacouse a xuntanza entre a INLAC (organización que agrupa a produtores e transformadores) e a distribución. Foi o propio Presidente da Xunta quen pediu ao Ministro que a impulsara, e tivo lugar a finais do mes de agosto. Nela abordouse a situación dos prezos e Galicia demandou dúas cuestións fundamentais: que era perentorio acabar coa venda a perda e coas vendas con marxes cruzadas.
Ademais, tamén subliñaron que se está traballando no ámbito europeo, coa mirada posta na reforma da PAC, solicitando a restitución á exportación, axudas ao almacenamento privado e a revisión de prezos de referencia de manteigas ou leite desnatada en pó, ou impulsando unha fronte común con Francia no seo do G-20 para evitar volatilidade de prezos de materias primas. Do mesmo xeito, e dentro de España, estase a traballar coa sinatura dun acordo de colaboración coa industria e a distribución para mellorar a cadea de valor e erradicar prácticas comerciais perniciosas que están a tirar os prezos do leite.
AUMENTO DA BASE TERRITORIAL DAS EXPLOTACIÓNS
Por outra banda, o foro agrogandeiro do Partido Popular de Lugo, celebrado en Outeiro de Rei sinalou os esforzos dirixidos a mellorar a estrutura da base territorial das explotacións que aumentou nun 248% (de 5,2 hectáreas a 18,1) e sinalaron a importancia de seguir traballando nesa liña.
Neste mesmo ámbito cómpre especial importancia a aplicación da Lei de Mobilidade de Terras, que permitiu multiplicar as solicitudes en relación coa época do bipartito e cuadriplicar as parcelas incorporadas ao Bantegal.