O PP de Pol faise eco, unha vez máis, das constantes queixas e malestar dos veciños do municipio, especialmente daqueles que viven nas parroquias, por mor do mal estado das pistas e camiños municipais, “que están en tan mal estado que a seguridade está en risco ao circular”.
A voceira popular, Nicole Grueira, recorda que “é unha obriga do alcalde e do seu equipo de goberno ter en bo estado as pistas e camiños do Concello”, algo que “desatende constantemente, destinando os poucos recursos económicos que ten o Concello aos seus caprichos”.
Nicole Grueira sinala que “non son frases feitas nin afirmacións baleiras” xa que “cómpre recordar como Lino Rodríguez tivo que acudir xa en varias ocasións á Deputación de Lugo para que lle enviasen fondos económicos para poder pagar gastos correntes, como facturas da luz, teléfono ou os seguros e reparacións dos coches municipais”.
A realidade é que os camiños e pistas municipais de Pol “están completamente abandonados” como puidemos constatar hoxe mesmo, por exemplo, nunha visita realizada á parroquia de Carazo. “Aquí comprobamos como o firme está en mal estado, roto e cheo de furados e non hai cunetas, mentres os poucos recursos do Concello van ao capricho do alcalde, o campo de fútbol”, criticou.
Nicole Grueira recorda que Pol precisa, de forma urxente, dun plan de mantemento e renovación de todas as pistas e camiños en mal estado “para que os veciños poidan circular con seguridade”.
Unha petición que xa se defendeu en varias ocasións no pleno, a última en setembro de 2025, atopando sempre “o non do alcalde, máis interesado nas súas cousas que en destinar os recursos económicos e materiais que as vías municipais teñan unhas condicións axeitadas de circulación ao longo do ano”. “Incluso negouse a que se defenderá esta petición nalgún pleno, vetando o debate desta moción”, criticou.
Como consecuencia “da total falta de mantemento” a situación que presentan as pista e camiños municipais “é dunha total falta de seguridade” xa que aumenta o risco de accidentes, prodúcense danos materiais nos vehículos así como picadas nas rodas, limitacións á mobilidade dos veciños e un progresivo illamento dalgunhas zonas do concello.
Nicole Grueira tamén explica que “sería preciso comezar a planificación dos desbroces” para que cando chegue o verán “se poidan realizar con normalidade e non ás présas ou que queden sen facer”. Neste senso, recorda como o alcalde se negou a apoiar, en outubro de 2023 e abril de 2025, mocións defendidas no pleno polo PP nas que se instaba ao Concello a iniciar de inmediato o desbroce e limpeza da maleza das pistas municipais da parroquia de Pol e de todas as demais que se atopasen na mesma situación, así como realizar os traballos oportunos de arranxo e pavimentación dos camiños municipais desta parroquia e de todas aquelas que se atopen na mesma situación.
Un total abandono que vai na mesma liña da falta de orzamentos municipais dende o ano 2022. “Seguramente todas as pezas encaixen e Lino Rodríguez non realiza o arranxo dos camiños porque non quere, porque quere destinar os recursos municipais aos seus caprichos, así como non está capacitado para aprobar uns novos orzamentos porque, a pesar de ter maioría no pleno, con conta realmente cos apoios necesarios dos seus concelleiros porque non concordan con este total abandono ao que somete aos veciños de Pol”, sentenciou.