Sábado, 22 de marzo de 2025. Os deputados do Grupo Provincial Popular mantiveron onte en Becerreá unha xuntanza de traballo con afiliados do PP no municipio e con veciños para explicarlles todos os pasos dados dende o Grupo Provincial de cara a acadar a apertura do centro de atención a maiores, así como para “asegurarlles que seguiremos a traballar para que a veciñanza de Becerreá e da comarca teña o mesmo trato que o resto de veciños da provincia”.
Durante esta xuntanza, o voceiro popular, Antonio Ameijide, detallou aos presentes “todos os pasos dados” dende o Grupo Provincial durante os últimos anos ata a actualidade para “reclamar a apertura da residencia de Becerreá”, ademais de explicar o contido da memoria aprobada por PSOE e BNG no pleno de febreiro (publicada no BOP do 7 de marzo) na que se recolle o modelo de xestión e os prezos estipulados que terán que pagar os futuros usuarios.
Neste senso, o voceiro provincial popular quixo deixar claro á veciñanza de Becerreá que “seguiremos traballando para que os veciños do municipio e da comarca teñan o mesmo trato que os do resto da provincia”, en referencia á diferencia de prezo que PSOE e BNG pretenden que haxa entre a residencia de Becerreá e os restantes centros da rede provincial.
Un camiño no que “dende o Grupo Provincial non deixaremos sos nin aos nosos compañeiros do PP nin á veciñanza de Becerreá porque o que queremos é igualdade de trato para todos os lucenses, independentemente do municipio no que residan”.
Antonio Ameijide detallou que dende o goberno provincial de PSOE e BNG insisten en crear na provincia veciños de primeira e veciños de segunda xa que segundo se establece na memoria, os usuarios da residencia de Becerreá pagarán 810€ máis ao mes, un 60% máis, que os usuarios das residencias de Navia ou Pedrafita xa que un veciño dependente na rede de CAMs da Deputación actualmente paga 1.390€/mes mentres que en Becerreá pagará 2.200€/mes polo mesmo servizo.
Ademais, na mesma memoria recóllese que a residencia de Becerreá “darase a unha empresa privada baixo un sistema de xestión privada con canon 0” pero que prevé beneficios anuais netos para a empresa concesionaria de entre 220.000 e 357.000€ e un volume total de negocio de 77.829.639,16€.
Esta decisión de PSOE e BNG certifica que o seu modelo de centros de atención a maiores “é un modelo fracasado” así como que “por fin quitaron a careta xa que o seu modelo é un modelo 100% privatizador” ao querer entregar un edificio construído con fondos de todos os lucenses a unha empresa para que privatice 96 prazas de residencia e 40 de centro de maiores.