No pleno do mes de febreiro, PSOE e BNG aprobaron a “Proposta da actividade económica e do réxime xurídico do Centro de Atención a Persoas Maiores de Becerreá”, un documento no que se recollen os aspectos social, xurídico, técnico e financeiro da actividade económica do centro e que se determina a súa forma de xestión.
Un documento no que non se recolle a data de apertura nin cando se sacará a licitación, xa que cómpre recordar que PSOE e BNG privatizarán a residencia ao 100%, pero si establece os prezos que pagarán os futuros usuarios, que serán un 60% máis caros que os do resto de centros da rede provincial.
- Tarifa residencia xeral persoa autónoma: 1.750,00 €
- Tarifa residencia xeral persoa dependente: 2.200,00 €
- Tarifa centro de día: 375,00 €
O voceiro provincial, Antonio Ameijide, recorda que mentres un veciño de Navia ou Pedrafita paga 1.390€/mes por unha praza de residente dependente, PSOE e BNG estipularon que un veciño de Becerreá pagará no mesmo réxime 2.200€
Por este motivo, os deputados populares defenderán no pleno unha iniciativa para instar ao equipo de goberno provincial a establecer e garantir que os prezos polos servizos prestados aos futuros usuarios no Centro de Día e Residencial Comarcal en Becerreá sexan os mesmos que os do resto de Centros de Atención a Maiores que forman parte da rede de centros construídos ou con cofinanciamento da institución provincial.
Ameijide pregunta “por que PSOE e BNG insisten en crear na provincia veciños de primeira e veciños de segunda” xa que segundo se establece na memoria os usuarios da residencia de Becerreá pagarán un 810€ máis ao mes que os usuarios das residencias de Navia ou Pedrafita polo mesmo servizo.
Dende o Grupo Provincial Popular recordan que no pleno de febreiro, PSOE e BNG non souberon responder a como controlarán o servizo que se prestará na residencia, unha licitación que, segundo a memoria presentada, “se dará a unha empresa privada baixo un sistema de xestión privada con canon 0” pero que prevé beneficios anuais netos para a empresa entre 220.000 e 357.000 euros e un volume total de negocio de 77.829.639,16€.
Antonio Ameijide afirma que “o expediente que o mes pasado aprobaron PSOE e BNG certifica que o seu modelo de centros de atención a maiores é un modelo fracasado” así como que “tanto socialista como nacionalistas por fin quitaron a careta xa que o seu modelo é un modelo 100% privatizador. “Queren entregar un edificio construído con fondos de todos os lucenses a unha empresa para que privatice 96 prazas de residencia e 40 de centro de maiores”, recordou.
Os deputados populares esixen a PSOE e BNG que pidan desculpas públicas “polas súas reiteradas mentiras” en relación á residencia de Becerreá, poñendo como exemplo que “sempre defenderon que tiñan os cartos suficientes para equipar este edificio pero na memoria que hoxe aprobaron establecen que será a empresa que xestione a residencia a que terá que investir 1.394.343,29€ para dotar de mobiliario, cociña e lavandería, cortinaxe e obras necesarias a realizar no exterior”.