Lugo, 18 de xaneiro de 2023. Nas distintas facetas da xestión do goberno provincial, presidido polo socialista José Tomé, hai moitas goteiras. En ocasións, o uso do termo “goteira” é unha maneira de facer referencia, tanto pola oposición como polos veciños afectados, ás deficiencias da xestión do equipo de Tomé. Pero noutras ocasións as goteiras son reais e son a consecuencia das “goteiras” na xestión de Tomé e dos seus socios nacionalistas. Así o sinala o portavoz popular, Javier Castiñeira, que di: “A xestión do BNG nas súas delegacións fai augas. Son ben coñecidas as goteiras do anexo do Pazo dos Deportes, cuxas consecuencias impiden facer unha boa práctica do deporte nesas instalacións, e que están sendo motivo de risa para moitos clubs que chegan á capital, a Lugo, e ven como as instalacións da Deputación de Lugo non son aptas para facer bo deporte”. Pero, engade Castiñeira, “lamentablemente isto contaxiouse a outro dos emblemas da Deputación de Lugo, que é o Museo Provincial; das pingueiras do anexo do Pazo pasamos ás do Museo Provincial”.
As goteiras, din os populares, “dan unha imaxe lamentable do Museo Provincial, que é un dos lugares máis visitados da cidade de Lugo”. Castiñeira explica: “Ademais de danar as propias instalacións, como son o teito e o chan, hai risco de que poidan danar as pezas, de incalculable valor, que hai nese museo. Isto demostra un malísimo mantemento por parte do BNG e pon en risco tamén a seguridade dos que alí traballan e das moitísimas persoas que visitan este museo”.
As goteiras nos edificios da Deputación, son en opinión do portavoz popular, boa mostra “da xestión que fai o BNG na Deputación de Lugo, que está demostrando claramente non estar capacitado para xestionar áreas tan importante como son as de Deportes e Cultura; quizá estean máis capacitados para facer oposición, que moi probablemente vai ser o que lles toque facer a partir do mes de maio deste mesmo ano”.
