Lugo, 25 de agosto de 2022. Os deputados do PP por Lugo, Joaquín García e Jaime de Olano, presentan unha batería de preguntas ao Goberno en relación coa situación do tráfico en Pedrafita, como consecuencia do desvío da A-6 a causa do afundimento do viaduto de O Castro. Os populares indican que durante o mes de agosto están a ser frecuentes as situacións caóticas producidas no termo municipal de Pedrafita, motivadas polo derrube do viaduto de O Castro e o conseguinte desvío da circulación pola N-VI que atravesa a localidade de Pedrafita do Cebreiro.
Os populares sinalan que nos últimos días, concretamente o pasado 21 de agosto, chegáronse a producir retencións de ata preto de 3 horas, con condutores atrapados nun tramo de 3 quilómetros con múltiples incidencias: coches avariados, familias con nenos na beiravía, etcétera.
Os deputados do PP por Lugo queren saber se o Goberno é consciente da situación que se dá en Pedrafita. Preguntan que medidas tomou para axilizar o tráfico ao seu paso pola localidade de Pedrafita e interésanse por coñecer se a Dirección General de Tráfico ten previsto adoptar medidas, coordinadas co Concello de Pedrafita, para regular a circulación, especialmente en xornadas de moita concorrencia como as das feiras.
Os populares preguntan por que razón os paneis informativos da Autovía A-6 non avisaron das retencións que se estaban producindo, o que permitiría que algúns vehículos buscasen o desvío pola N-VI.
García Díez e Olano indican que está próxima a operación retorno e queren saber que dispositivos especiais pensa poñer en marcha o Goberno para evitar que se volvan a repetir as lamentables situacións de caos e descoordinación vividas recentemente. A maiores, os populares solicitaron a comparecencia do director da DGT para que explique que medidas pensan adoptar para evitar que se repitan estas situacións de caos.