Viveiro, 29 de xuño de 2022. Manter pechado durante varios anos o acceso á unha praia en área urbana e ao pé dun dos máis coñecidos hoteis de Galicia é un luxo que ningunha cidade se pode permitir e máis se é unha pequena cidade, como Viveiro, que precisa rendibilizar todos os recursos de que dispón. O Concello leva anos sen facer xestión práctica algunha para reabrir o acceso á praia de Sacido, pasividade só entendible, di o portavoz popular, Óscar Rodríguez, no marco da total ineficacia na xestión xa amplamente demostrada da alcaldesa, María Loureiro (PSOE), e o seu equipo. Os populares esixen ao goberno local que, de inmediato, adopte as medidas precisas para abrir o citado acceso.
Que a praia de Sacido non ten acceso dende hai varios anos por causa da probada desidia do goberno municipal era algo máis que unha sospeita, pero dende xuño do 2020 xa non hai dúbida algunha porque a propia alcaldesa, María Loureiro (PSOE), recoñeceu no pleno que tiña gardado un proxecto, redactado por Costas; é un proxecto que, xa entón, estaba feito dende había máis de ano e medio. Así o sinala o portavoz popular, Óscar Rodríguez, que lembra que Sacido, “ademais de ser unha praia fermosa, ten ao seu carón un hotel de catro estrelas; o acceso pechado dá unha imaxe deplorable e priva do seu uso aos veciños de Viveiro e aos visitantes”. Rodríguez sinala: «Dende entón nada se avanzou. O acceso á praia sigue pechado e toda a zona está feita unha selva. É unha pena e unha actitude inexplicable por parte do goberno municipal”.
Os populares instan á alcaldesa Loureiro a adoptar as medidas necesarias para abrir canto antes o acceso á praia de Sacido, nas debidas condicións de seguridade. Óscar Rodríguez manifesta: “É inaudito que cinco anos despois sigamos igual, sen que o goberno municipal faga nada para resolver o problema. Os veciños de Viveiro teñen un bo exemplo neste caso da falta de capacidade do goberno local para defender os intereses do municipio, é dicir, os intereses dos veciños de Viveiro”.