Partido Popular de Lugo

Manuel Lorenzo Varela, elixido presidente do PP de Chantada

Chantada, 18 de xuño de 2022. Manuel Lorenzo Varela vén de ser elixido presidente do PP de Chantada por aclamación no congreso local. O popular, que estivo arroupado pola secretaria xeral do PPdeG, Paula Prado, e a presidenta provincial, Elena Candia; ademais de por outros cargos orgánicos como o secretario xeral, Javier Nodal, e o coordinador xeral, José Manuel Balseiro, sinalou que este cónclave serve “para unir aínda máis a todas as sensibilidades do centro-dereita de Chantada. Estou convencido de que, efectivamente, será así e o partido chegará as próximas eleccións municipais en condicións de conseguir unha maioría aínda máis ampla da que ten na actualidade”, manifestou.

Neste senso, a líder dos populares na provincia puxo en valor “o compromiso indiscutible” de toda a candidatura, cuxo traballo reverterá, dixo, “en seguir facendo deste municipio un referente no esplendor e oportunidades socioeconómicas que ofrece toda a Ribeira Sacra. Son homes e mulleres con experiencia e, que por riba de todo, queren o mellor para o seu concello. Que dean este paso adiante non é un tema menor, polo que lles agradezo en primeira persoa esta implicación”, remarcou.

Elena Candia púxose a disposición do novo equipo para que no 2023 “Chantada siga estando gobernada polo Partido Popular porque, se algo é totalmente comprobable e constatable, é que os grandes avances, os grandes proxectos e as grandes obras, teñen o selo dos gobernos do PP”.

O traballo, a carta de presentación do presidente local

Precisamente, e con este mesmo obxectivo, Varela sinalou que o equipo directivo que sae do congreso ten como obxectivo crear as condicións para que dende o Concello sexa posible avanzar aínda con máis rapidez na mellora das infraestruturas e servizos de Chantada, e facelo da maneira máis satisfactoria para toda a sociedade chantadina.

O veterano alcalde destacou a importancia do traballo efectuado nos últimos anos, despois de superar as graves dificultades que atoparon no ano 2011 ao retornar á alcaldía. “Entre 2011 e 2016 foron anos moi difíciles, por distintos motivos, entre eles pola situación na que o anterior equipo de goberno deixou o Concello. Foi necesario facer un plan de reaxuste. Agora o Concello está en moi boas condicións”. Destaca que “as estradas municipais están sendo pavimentadas con aglomerado en quente; xa hai 30 quilómetros e pronto haberá 12 máis. Entre outros logros figura a adquisición de dous edificios nos casco histórico: un deles será biblioteca e, o outro, sede de servizos administrativos do Concello”.

Varela resaltou a mellora de infraestruturas eléctricas e o éxito do polígono industrial, a tal punto que pronto terá que ser obxecto dunha ampliación. Neste senso, lembrou tamén as melloras no pavillón polideportivo, no campo de fútbol, nos paseos fluviais e nas zonas axardinadas. Satisfeito co resultado da feira do viño deste ano, celebrada en fecha inusual, espera que a da próxima edición recupere as datas tradicionais. E anuncia que as festas de agosto deste ano “probablemente terán o mellor programa da historia das festas de Chantada”.

A lista

A lista que se presenta ao congreso para dirixir o partido durante os próximos anos está encabezada por Manuel Lorenzo Varela Rodríguez. Está integrada por: Blanco Vilela, Arturo; Carnero Blanco, Cándida; Diéguez Carballo, Manuel; Diéguez Fernández, Juan Alberto; Eiriz López, Rosa María; Fernández Águila, Pamela; Fernández Francisco, Luis, Fernández Ledo, Erica; Fernández López, Concepción; Fernández Reinoso, Ramón; González Vilela, Ana; López Abella, Susana; López Viana, Javier; Méndez Fernández, José Antonio; Otero Veiga, Diego; Quintana Fernández, Rubén, Rodríguez Medela, Javier; Vila Lamazares, Patricia; Vázquez Doval, Rubén.

A lista, segundo explica Manuel Lorenzo Varela, reflicte ao PP e á sociedade chantadina, tanto dende o punto de vista das idades dos seus membros, como polas súas ocupacións e preocupacións.

No prazo de poucos días, a directiva que sairá do congreso celebrará unha reunión na que se decidirá a asignación das distintas responsabilidades por secretarías.