Partido Popular de Lugo

O PP vilalbés advirte que o Concello dispón de 364 horas mensuais do SAF sen asignar, mentres hai 252 usuarios en lista de agarda

Vilalba, 16 de xuño de 2022.A voceira do Grupo Municipal Popular, Sandra Vázquez, esixe unha “xestión eficiente dun servizo esencial para os nosos maiores e dependentes” como é o Servizo de Axuda no Fogar (SAF) ante a “falta de dilixencia” á hora de asignar horas de atención que o Concello de Vilalba ten dispoñibles.

A día 14 deste mes de xuño eran 364 as horas mensuais dispoñibles pero sen asignar a ningún usuario, mentres que o goberno local socialista acumula 252 expedientes sen atender: 4 de grao III, 42 de grao II e 205 de grao I. “A Xunta incluso está en disposición de ofrecer máis horas, pero o goberno local non é capaz de xestionar as que xa ten asignadas”, condena.

Vázquez explica que “mentres a Xunta resolve os expedientes o máis rápido posible e pon recursos para atender aos nosos maiores e dependentes, o Concello non se está a preocupar o suficiente para que ningún quede sen a atención que necesita e merece”. Ademais, a popular matiza que se trata dun servizo moi importante non só para os propios usuarios, senón tamén para as súas familias.

A voceira popular e deputada autonómica explica que a achega da Xunta ao Concello de Vilalba para o ano 2022 é de 2.077.020 euros, un 13,4% maior que ao inicio de 2021 debido ao incremento da achega da Xunta ata os 11 euros por hora. Deste xeito, a administración autonómica ofrece maior apoio económico aos Concellos para prestar este servizo. É máis, “este ano a Xunta conta cun orzamento histórico en política social que ascende a 927 millóns de euros”.