Monforte de Lemos, 30 de maio de 2022. Os populares de Monforte consideran que “a chuvia intensa de onte evidenciou as chapuzas de Tomé”. A voceira, Katy Varela, subliñou que “a estampa apocalíptica que se viviu durante algunhas horas na cidade de Monforte é un reflexo da xestión de Tomé á fronte da alcaldía de Monforte”.
A popular apunta que “os sumidoiros están colapsados e os monfortinos sufriron as súas consecuencias. Tal e como nos comentaban os veciños, comprobamos que a aparición de ratas mortas e sucidade solidificada. É certo que a chuvia foi intensa e continuada durante preto dunha hora, pero tampouco podemos negar que a nosa rede de saneamento e abastecemento non está no estado máis óptimo”.
Como xa advertiran dende o Grupo Municipal Popular tralas obras na Praza Doutor Goyanes e Armando Cotarelo, “a auga estancouse onte nesa zona; igual que na rúa Corredoira e noutros puntos onde o asfalto é constante”.
Katy Varela defende “gastar o diñeiro de todos con cabeza e moito razoamento para evitar que en Monforte se volvan a dar situacións coma estas; e non gastar para aparentar que se fan cousas”, puntualiza.
Contratación do SAF
A voceira do Grupo Municipal Popular explica tamén que “o equipo de goberno local leva ao pleno deste luns a aprobación do expediente de contratación do Servizo de Axuda no Fogar. Aínda que, curiosamente, está xa na plataforma de contratacións publicado dende o día 13 de maio”. A popular condena, polo tanto, que “Tomé volve a traballar de forma caótica e sen a orde legalmente establecida. Despois estráñase das denuncias e demandas que lle presentan”.
Ademais, “os medios de comunicación fixéronse eco do malestar dos empregados do servizo co prego do contrato, o que implica que Tomé novamente evitou sentarse a falar cos verdadeiros implicados neste asunto e enzárzase nun novo conflito”, conclúe Varela.