Viveiro, 22 de abril de 2022. A xestión do goberno local, presidido pola socialista María Loureiro, é un exercicio de confusión, que ten como consecuencia ineficacia e falta de atención ás necesidades dos veciños de Viveiro. Así o entende o grupo municipal do PP, cuxo portavoz, Óscar Rodríguez, anuncia a presentación dunha moción para destinar o importe do sobrante das axudas municipais establecidas a raíz da pandemia a autónomos, ao comercio e ás pemes, aproximadamente 182.500 euros.
Os populares lembran que para paliar as consecuencias económica producidas pola pandemia de Covid-19, o Concello acordou destinar 400.000 € do orzamento municipal para axudas a autónomos e pemes. Rodríguez explica: “Debido a distintos motivos, ao remate da convocatoria estimáronse 261 axudas, por importe de 217.430 €, polo que quedaba un remanente de 182.570 €”.
No PP destacan que como consecuencia da disparatada suba das tarifas eléctricas, o incremento do prezo dos combustibles e a suba de alugueres, tanto o comercio como os
autónomos e a pequena empresa pasan por momentos delicados. Os populares entenden que, á vista da situación, é preciso destinar a cantidade sobrante a estas alturas dos 400.000 euros iniciais aos fins para que foi prevista inicialmente.
Saúdos
Gabinete de Comunicación