- Os populares advirten de que “as consecuencias da decisión unilateral de Cajoto serían devastadoras especialmente para os maiores do municipio, que non terían prioridade na entrada e terían que ir para outras localidades, no caso de non entrar na residencia de Foz”
- No PP queren que o Concello “canto antes prepare os pregos para renovar a concesión en xaneiro do ano 2023, posto que, á vista de como xestionou o contrato de Axuda no Fogar, no que se tardaron tres anos, xa imos tarde para non ter problemas”
- De saír adiante o intento de Cajoto “os traballadores serían outros dos afectados, posto que a rede do Consorcio ten o seu propio sistema de xestión, totalmente independente do que leva o Concello”
- O PP está convencido de que “non estaría garantido nin para os actuais nin para os veciños que no futuro quixeran ir a residencia da nosa localidade”
Foz, 20 de abril de 2022. O alcalde de Foz, o socialista Fran Cajoto, ten sobradamente demostrado o seu nulo interese por xestionar os servizos municipais a favor dos seus veciños. Agora, de novo, se pon de manifesto esta maneira de exercer o poder local coa súa teima de ceder a Residencia á rede galega do Consorcio, co que deixaría de estar garantida a prioridade dos maiores de Foz para acceder a este servizo. O portavoz popular, Javier Castiñeira, sinala: “O grupo municipal do PP pide ao señor Cajoto que se esqueza de ceder a Residencia á rede galega do Consorcio e que canto antes prepare os pregos para renovar a concesión en xaneiro do ano 2023, posto que, á vista de como xestionou o contrato de Axuda no Fogar, no que se tardaron tres anos, xa imos tarde para non ter problemas”.
Castiñeira explica: “As consecuencias da decisión unilateral de Cajoto serían devastadoras especialmente para os maiores de Foz, que non terían prioridade na entrada e terían que ir para outras localidades, no caso de non entrar na residencia de Foz. Tamén se verían afectados os traballadores, que serían outros dos prexudicados, posto que a rede do Consorcio ten o seu propio sistema de xestión, totalmente independente do que leva o Concello”.
No PP destacan que levan tempo “pedindo ao alcalde no pleno que cambie de opinión, pero insiste na súa idea, que consideramos que é algo persoal, non é a idea que tiveron no seu momento na anterior corporación, cando se sacou adiante este proxecto, moi necesario e vital para Foz, como era o da Residencia”. Engaden: “Fixemos todo o posible para que ficaran en Foz os maiores e os traballadores que estaban no Asilo. Agora, con esta decisión, non estaría garantido nin para os actuais nin para os veciños que no futuro quixeran ir a residencia da nosa localidade”.
En opinión de Castiñeira a razón que move a Cajoto “é única e exclusivamente aforrar nunha partida de axudas, que a día de hoxe existen para os residente locais con menos medios; Cajoto alega que é unha competencia da Xunta de Galicia, e por iso quere desligarse de todo”.