- O ata agora presidente dos populares no municipio sinala que o obxectivo é abrir o partido para que estea nas mellores condicións para as próximas eleccións locais.
- Cela sinala que, dende o grupo municipal, do que é portavoz, prestará total apoio a quen asuma a presidencia para impulsar e dinamizar o partido.
- A dirección popular dará a coñecer nos próximos días as súas decisións con respecto a distintos aspectos do partido no ámbito local.
Lugo, 13 de abril de 2022. O ata agora presidente do PP de Becerreá, Miguel Ángel Cela González, decidiu dar un paso atrás e deixar esta responsabilidade co fin de promover a apertura do partido e centrarse máis intensamente aínda no traballo do grupo municipal, do que é portavoz. Así o comunicou nas últimas horas á dirección provincial do partido, nunha reunión celebrada en Becerreá.
Cela González levaba dende 2015 á fronte do PP de Becerreá. Agora considera que, para preparar as próximas eleccións locais, o partido debe abrirse aínda máis á sociedade e cre que, no seu caso, é o momento de dar un paso atrás. Nos próximos días coñeceranse as decisións do partido, na liña de impulsar a escoita activa da sociedade neste municipio e o crecemento da organización dende a unidade e a participación.
O ata agora presidente do PP de Becerreá asegura que centrará o seu esforzo no traballo do grupo municipal, que non experimentará cambios e que colaborará, como sempre, decididamente co partido. O obxectivo, sinala, é conseguir o mellor resultado nas próximas eleccións, de maneira que o PP chegue ao goberno municipal.