A conservación do patrimonio inmobiliario público e privado é unha das obrigas dos gobernos municipais, que dispoñen de ferramentas e recursos de moi distinto tipo para materializar esta obriga. Máis aínda cando se trata de inmobles que teñen algún grado de protección no planeamento urbanístico. O grupo municipal do PP presentou un rogo no pasado pleno, para que o equipo de goberno busque solucións, cos propietarios, para o edificio do Asilo de Foz, que está sen actividade dende hai dous anos, dende que o anterior goberno municipal deu solución ao servizo de residencia e centro de día, creando unha nova construción á que se trasladaron os maiores e os traballadores.
O portavoz popular en Foz, Javier Castiñeira, sinala: “A partir de aí, está abandonado e son moitas as queixas dos veciños que pasan por alí, que comprobaban que o edificio non está coidado, nas condicións que merece. Se seguimos así é posible que a situación empeore moito”. Explica: “ Igual que no seu momento o anterior goberno deu solución a todos aqueles problemas económicos que tivo que solventar o asilo mentres non se sacaba adiante o novo servizo e financiou estas circunstancias, creou a nova residencia e centro de día, o actual goberno debe tratar de velar polo edificio”. Castiñeira lembra que “o anterior goberno aprobou tamén o Plan Xeral que protexe ese ben, que todos os focenses sabemos que é emblemático, quizá un dos máis importantes que ten o noso patrimonio e queremos que se conserve en bo estado”.
De manterse a actual situación de abandono, os populares cren que “en poucos anos o edificio vai ter moitos máis problemas”. Por elo, solicitan “ao goberno que se involucre máis; non estamos nada de acordo coa resposta que deu o alcalde, que veu a dicir que o Concello non ten nada que ver neste asunto porque se trata dun edificio privado. Claro que ten que ver; é un edificio singular, e o Concello sempre mediou para que esa institución saíse adiante e o edificio debe ser conservado”.
En síntese, “o PP pide ao alcalde que busque solucións; algunhas delas poderían ir encamiñadas a dar acollida a asociacións mediante un convenio que permitise manter o edificio en boas condicións mentres non haxa unha solución definitiva”.