Os senadores lucenses –José Manuel Barreiro, Rosa Arza e Manuel Varela-, ante o abandono institucional público e notorio do Goberno, volven a demandar na Cámara Alta o restablecemento das liñas de ferrocarril canceladas polo estado de alarma na provincia. Os populares, que xa fixeron esta reivindicación en distintas ocasións, insisten novamente na necesidade da súa posta en marcha con carácter inmediato para non prexudicar tamén aos estudantes que precisan deste servizo para regreso ás aulas.
O pasado mes de marzo, Renfe deseñou un plan de transporte axustado á normativa contemplada no Real decreto 463/2020, do 14 de marzo, polo que se declara o estado de alarma para a xestión da situación de crise sanitaria provocada pola Covid-19, que incluía a cancelación e/ou redución da súa oferta en relación cos trens comerciais AVE, Longa Distancia, Media Distancia e Avant. En total, elimináronse 29 trens en Galicia, que unían o noso territorio con Madrid, Barcelona, País Vasco, León, varias cidades da meseta, Portugal e entre cidades e vilas galegas.
Así, desde que a compañía ferroviaria comezou a súa escalada o pasado mes de xuño, só restableceu catro das liñas canceladas, deixando á provincia de Lugo nunha situación de grave dano económico e social, na medida en que privou aos cidadáns lucenses e aos turistas da posibilidade de viaxar en tren.
O ministerio de Transportes alegou en xullo que os trens suprimidos se recuperarían a un ritmo adaptado á demanda, pero isto non sucedeu e decenas de viaxeiros seguen a verse prexudicados polos recortes neste servizo público. “Agora, o regreso ás aulas só agrava o problema, especialmente en localidades como Monforte de Lemos, unha das principais afectadas pola cancelación das liñas de tren”, destacan.
Esta situación provocará que, nos vindeiros días, moitos universitarios terán serias complicacións para equilibrar horarios e desprazamentos pola falta de conexións de tren. Trátase dun problema que afecta tanto aos mozos estudantes residentes en vilas da provincia de Lugo que viaxan ao campus da capital como aos que deben viaxar a outras cidades galegas como A Coruña, Santiago ou Vigo.
Do mesmo xeito, a falta de conexións coas cidades da meseta e incluso de Portugal dificulta a posibilidade de estudantes interesados en estudar en Lugo, co dano que este feito supón tanto para os propios estudantes como para a cidade.
“En consecuencia, se o Goberno central non está a aproveitar a situación de pandemia para cortar os servizos esenciais e prexudicar a unha comunidade autónoma xa castigada a nivel ferroviario, con infraestruturas en mal estado, con convois antigos e interminables atrasos, debería restablecer inmediatamente as liñas ferroviarias canceladas e contribuír así a un regreso seguro e accesible á aula para todos os estudantes”, manifestan.