Os candidatos do PP por Lugo para as eleccións autonómicas do próximo día 12 con domicilio na Mariña cumprirán estritamente as indicacións de Sanidade fronte ao rebrote na comarca de contaxios de covid-19 e, consecuentemente, decidiron adaptar os actos da súa campaña electoral ás instrucións. Seguirán informando aos cidadáns da importancia de acudir a votar e de facelo pola estabilidade, fiabilidade e experiencia que representa Alberto Núñez Feijóo
A Consellería de Sanidade anunciou que a partir das 00.00 horas de hoxe e durante cinco días non se poderá entrar e saír da comarca, salvo por causa xustificada. Os candidatos populares residentes na Mariña destacan que, coa colaboración de todos, os rebrotes serán controlados eficazmente.
Os mariñáns membros da lista popular resaltan que, en calquera circunstancia, o prioritario é a saúde. Pola súa parte cumprirán estritamente as medidas decididas polos técnicos sanitarios, porque é –din- a maneira de frear canto antes os rebrotes e avanzar e consolidar a recuperación da normalidade.
Os membros da lista do PP por Lugo con domicilio na Mariña están convencidos de que, como xa ocorreu durante o pasado confinamento, a colaboración cidadá será moi intensa e os contaxios frearanse con rapidez.