O senador lucense, José Manuel Barreiro, recoñece que as últimas noticias sobre a situación de Alcoa “son moi preocupantes” e atisban que o final da planta de San Cibrao pode ser o seu peche definitivo. Por este motivo, e co fin de presionar ao Goberno para que non eluda a súa responsabilidade sobre este asunto, a pesares de estarmos inmersos nunha crise sanitaria, pedirá no Senado que o Executivo de Sánchez aprobe o estatuto electrointensivo para que a multinacional poida seguir producindo cuns prezos competitivos.
“Esta é a clave do asunto. Nin a parálise das cubas que xa están a piques de rematar a súa vida útil, nin a crise sanitaria son o problema. Isto é unha cuestión dos prezos e cos actuais Alcoa non pode competir a nivel mundial. Alcoa e A Mariña non estarían en corentena permanente dende hai dous anos se o Goberno tivese aprobado o estatuto. Tempo tivo dabondo porque tanto o Partido Popular, como o comité de empresa, os traballadores e as empresas auxiliares levamos advertindo da situación meses sen obter unha resposta por parte do Goberno”, destaca.
O Goberno desvía o problema
É, por este motivo, adianta, “que seremos moi contundentes e non aceptaremos que se desvíe o problema por outras vías”. “Todos sabemos que a pandemia derivou tamén nunha redución da demanda de aluminio, pero isto no é escusa para non atallar a cuestión. A solución é moi simple e volto a dicilo, que o Goberno aprobe o estatuto e Alcoa e os 5.000 traballadores que dependen desta fábrica respirarán por fin tranquilos”, manifesta.
“Nunca Galicia tivo un ministro ou ministra que tampouco fixo pola súa terra”
Dado que “estamos a falar da maior industria da provincia”, xeradora de miles de postos de traballo directos e indirectos, o popular apela tamén á responsabilidade da ministra de Traballo. “A Sra. Yolanda Díaz é galega, a Sra. Yolanda Díaz é coñecedora de que a responsabilidade é do seu Goberno, pero, sen embargo, semella que o tema non vai con ela. Nunca antes Galicia tivo un ministro ou ministra galega que tan pouco fixese pola súa terra”, sentencia.
Cos traballadores
Deste xeito, e tal e como xa lles anunciaron en días pasados o propio Barreiro, os alcaldes de Xove e Cervo, a presidenta provincial e Jaime De Olano ao comité de empresa, o senador advirte que “non baixarán a garda” e seguirán pedindo no Senado e nas demais administracións que o Goberno, que é quen ten as competencias, pode solucionar se quere o problema coa aprobación do documento electrointensivo.