O Grupo Municipal do Partido Popular (GMP) burelés valora “moi positivamente” o incremento de horas de Servicio de Axuda no Fogar (SAF) que a Xunta de Galicia lle concede ao Concello de Burela. “Se ata agora o número total de horas por mes era de 2.788, agora será de 4.593, o que supón un incremento de preto do 65%, incremento moi considerable que debemos xestionar con seriedade e rigor pero sen demora”, destaca.
O voceiro popular, Manuel Rouco, demanda do alcalde “máxima axilidade na distribución destas 1.805 novas horas de SAF. O Concello conta con persoal moi cualificado no departamento de Servicios Sociais, polo que calquera demora que se produza será achacada á desidia do alcalde e do seu goberno”, afirma. Rouco considera que “hai demanda máis que sobrada para esas horas, así que é obriga do alcalde e do seu goberno distribuílas canto antes”.
LLANO, DESLEAL
Manuel Rouco sinalou que “Llano demanda dos demais a lealdade que el non aplica”. Proba delo, apunta, “é que semella apropiarse, na súa última nota de prensa, da adquisición de ordenadores que a Xunta envía ao IES ‘Perdouro’, o que nos parece inadmisible. Ademais, non lle viría mal falar algo máis cos autónomos e pequenos empresarios para coñecer de primeira man cales son as súas demandas, para non quedar en evidencia”, conclúe.