Partido Popular de Lugo

O PP pide “respecto” para os ribadenses na subida das taxas municipais por mor dos atrasos acumulados na súa actualización por parte do goberno local

6, novembro, 2019. O Grupo Municipal do PP pediu respecto para os ribadenses durante a última sesión plenaria da Corporación local en relación á subida de distintas taxas municipais por parte do goberno local debido ao atraso acumulado na súa actualización.

A concelleira popular Begoña Sanjurjo sinalou sobre o imposto que grava o subministro de auga que “na comisión informativa o rexedor local asegurou que non se tivera actualizado dende setembro de 2011 debido a que situación económica non era boa”. Agora, que se ve incrementado nun 7,2% debido á variación do IPC acumulado, os populares propuxeron realizar unha subida gradual, pouco a pouco, ao longo dos vindeiros anos “porque o contexto económico non parece mellorar”.

Ao ter rexeitado dende o goberno do BNG aplicar este medida que pretendía evitar prexudicar aos fogares ribadenses, os edís do Grupo Municipal Popular votaron en contra desta actualización, de igual xeito que no caso da actualización da taxa polo saneamento. Sanjurjo criticou que “o equipo de goberno asegure que a subida non se notará porque se reduce a taxa da recollida do lixo que se cobra no mesmo recibo” ao entender que “os ribadenses merecen notar esa baixada que aplica Sogama –non o Concello- e non teñen por que sufrir unha subida noutro concepto para compensar que o equipo de goberno do BNG non actualizara a taxa ano a ano”. Ademais, para a popular “é incrible que dende o executivo do BNG propoñan unha subida de máis do 7% por un servizo que é deficiente”.

 

Sobre a reducción do imposto pola recollida do lixo -para a que os populares se amosan a favor-, Sanjurjo sinalou que “hai que ser fiel á verdade” e, polo tanto, explicou que “esta baixada non a propón o goberno local, senón a administración autonómica”. Concretamente, expuxo que “dende o Concello de Ribadeo deberíase ter repercutido na veciñanza xa o ano pasado unha bonificación do 10% no canon de Sogama; pero non se fixo”. Agora, polo tanto, “Sogama insta ao Concello a repercutir sobre a taxa unha bonificación acumulada do 20% e a partir do 2021, do 10%”.

 

Modificación do IBI

Os populares votaron non á modificación do Imposto de Bens Inmobles (IBI) ao considerar que se trata dun “chanchullo” do executivo ribadense. Sanjurjo desmentiu “a suposta baixada deste imposto” porque “para compensar a suba dos valores catastrais do coñecido como catastrazo, o imposto si que baixa este ano; pero recupérase no 2020 para o que a ordenanza do 27 de marzo do 2018 fixa o coeficiente aplicable sobre o valor catastral para o cobro do IBI nun 0,62 subindo dende o 0,57”. Polo tanto, “o IBI non baixa, senón que sube”.

 

Tendo en conta que o Grupo Municipal Popular levaba no seu programa electoral a baixa dos impostos municipais, os edís do PP votaron en contra desta modificación.

 

Subministro eléctrico e servizo de telefonía

Na quenda de rogos e preguntas, os populares esixiron ao goberno de Fernando Suárez que estude distintas ofertas de empresas de subministro eléctrico e de telefonía co obxectivo de “reducir gastos xerais e contribuír, así, a cumprir a regra de gasto e, polo tanto, evitar as discrepancias que amosa tesourería”.