Os populares destacan os “importantes apoios” que ofrece a consellería de Medio Rural aos titulares de montes veciñais en man común, agrupacións e mancomunidades ou Sociedades de Fomento Forestal (Sofor) dirixidos á prevención de danos causados nos montes polos incendios, desastres naturais e catástrofes. Concretamente, á zona sur da provincia de Lugo o Goberno galego destinou máis de 350.000 euros a 45 comunidades en achegas cofinanciadas co Fondo Europeo Agrícola de Desenvolvemento Rural (Feader).
Trátase de subvencións convocadas pola Xunta co obxectivo de “contribuír a minorar os impactos negativos que os incendios forestais poidan provocar sobre a capacidade produtiva dos montes e, tamén, a garantir a protección axeitada para a fauna, a flora e a paisaxe”. Así, son subvencionables o control selectivo de combustible forestal e a construción de puntos de auga.
Achegas por municipios
Ata un total de 13 comunidades do municipio de Quiroga recibirán máis de 109.000 euros destas axudas da Xunta para desenvolver tarefas de limpeza de montes: Campo do Val, Fisteus, Goia, Vilaboa e Vilameá, Bustelo de Fisteus, Lamas e San Cristovo, a comunidade de montes veciñais en man común da Conchada, Paradaseca, Campos de Vila, Lamela, Revide e Toca, Pacios da Serra, Centeais e Ferreira, Vilar de Mondelo, Vilar de Lor, Enciñeira, Cereixido e Albaredos.
A Bóveda dirixiranse máis de 19.000 euros cos que actuar en Martín e na comunidade de Ver; mentres que a comunidade de montes de Nogueira, en Chantada, recibirá algo máis de 2.500 euros. No caso de Folgoso do Courel, son as comunidades de Visuña e Céramo, Meiraos, Folgoso e Escrita e Monteiros as beneficiadas cunha achega de máis de 35.000 euros. No seu caso, as axudas para as comunidades de Monforte ascenden a algo máis de 20.000 euros e diríxense á CMVMC de Serra de Marexe, Villamaior e Serra de Cubas: Marcelle e San Pedro de Baños e Palleiros.
No caso do municipio de Pantón, os beneficiarios son veciños de Bazal, Cascaxide, Piuca, Torre, Torrón e Vilamirón; Pombeiro -agás os lugares anteriores-; Cangas- San Fiz; Tuiriz e Frontón que recibirán máis de 57.700 euros. E a CMVMC Cornide e Veliñas, Liñares; Airavella, Pumar e rúa do Pozo; Parada dos Montes, Ferreirúa; Salcedo e Bairán e Hórreos –todas do municipio da Pobra do Brollón- beneficiaranse dunhas achegas de preto de 35.000 euros.
No caso do municipio de Ribas de Sil a comunidade beneficiada será a de Torbeo que recibirá algo máis de 6.000 euros. Ao termo municipal do Saviñao o Goberno galego dirixiu máis de 13.600 euros dirixidos ás comunidades de Abuíme, San Santurnino de Piñeiró e Cazón e Gudín. Os montes de Doade, Neiras, Brosmos e Anllo-Santo Esteve, todos do termo municipal de Sober, recibirán máis de 19.000 euros. E o concello de Taboada recibirá preto de 33.000 euros dos que se beneficiarán Santa Eulalia de Vilar de Cabalos, Xián e a Mancomunidade de Montes Veciñais en Man Común de Vilameñe. En tódolos casos, os solicitantes ativéronse á primeira liña de axudas.
A porcentaxe subvencionable das accións que deseñan previamente os propios solicitantes a través dun plan de traballo pode alcanzar o 100% do seu custe polo que as comunidades beneficiarias só deberán achegar o IVE. En total, o departamento de Medio Rural destina máis de 1.130.000 euros á nosa provincia dos que se benefician 126 solicitantes. Algo máis dun millón diríxense á limpeza de montes e 130.000 euros á construción de puntos de auga.