9, novembro, 2018. O Partido Popular de Láncara organiza unha xuntanza para homenaxear aos concelleiros dos pasados mandatos. Será nun xantar que se celebrará este sábado 10 de novembro no polifuncional do Campo da Feira da Pobra de San Xiao coa participación do conselleiro de Medio Rural, José González; a presidenta do Partido Popular da provincia de Lugo, Elena Candia; alcaldes de municipios limítrofes e outros membros do Partido Popular.
O acto serve de agarimo para todos os concelleiros populares que “traballaron dende a corporación municipal polo desenvolvemento do municipio de Láncara”, segundo indica o voceiro popular no concello, Santiago Cubillas, que lembra especialmente os 30 anos do popular Eladio Capón á fronte do Concello acompañado por moitos dos homenaxeados no acto e “a dedicación” de Ricardo Núñez á fronte do partido local durante máis de 20 anos.
Ademais de Eladio Capón e Ricardo Núñez; os homenaxeados serán Julio Iglesias, farmacéutico falecido da Pobra; Manuel Castro, casa Monarca de Mourillón; Odón Farelo, casa Enriqueta de Láncara, tamén falecido; Jesús Folgueiras, Aixor de Toirán; Begoña Rivera, da Pobra; Manuel Pallares, Ventura de Armea; Amador López, de Monseiro; José Manuel Álvarez, de Cedrón; María Pilar Toirán, da Pobra; e Andrés Caballero, da Pobra.