Partido Popular de Lugo

O Grupo Provincial do PP consegue un incremento nos Orzamentos de SUPLUSA de 2,5 millóns de euros

O Grupo Provincial do PP conseguiu esta tarde no Consello de Administración de SUPLUSA un incremento de 2,5 millóns de euros nos Orzamentos cos que contará a entidade para desenvolver o seu plan de actuación, investimento e financiamento do presente ano. Así, a contía sobe ata os 5.953.200,86 euros no apartado de ingresos de explotación.

En concreto, os populares demandaron un investimento de 556.973,88 euros a maiores para desenvolvementos en execución nas áreas industriais de Burela, O Vicedo, Trabada, Abadín, Riotorto, Lourenzá, Vilalba, Meira, Cospeito, Pol, Begonte, Castroverde, A Fonsagrada, Pedrafita, Baralla, Becerreá, Láncara, Antas de Ulla, Guntín, Paradela, Samos, O Incio, O Saviñao, Chantada, Carballedo, Pantón, A Pobra do Brollón, Sober, Viveiro-Chavín, Monforte e Triacastela. A partida final, tras o incremento no Orzamento proposto polo PP, é de un millón de euros.

Os outros 1.943.206,12 euros irán destinados, a petición dos conselleiros do PP, á construción de fogares residenciais con centro de día. Os populares logran ademais dúas novas residencias que se construirán en Folgoso do Caurel e Portomarín. A partida destinada a estes proxectos sociais aumenta así ata os 4.552.608,37 euros.

A voceira do Grupo Provincial do PP, Elena Candia, afirma que non se explica o recorte no orzamento que quería aplicar o bipartito, polo que serán os populares os que garantan un incremento da contía que vai repercutir de xeito esencial no desenvolvemento industrial da provincia e dará un impulso á creación de residencias para maiores en concellos nos que non estaban proxectadas por socialistas e nacionalistas.

O PP lamenta que socialistas e nacionalistas votaran en contra das emendas propostas polo Grupo Provincial Popular, que finalmente se aprobaron con cinco sufraxios a favor, fronte aos catro en contra do bipartito e que permiten a ampliación do Orzamento en 2,5 millóns de euros.