Lugo, 21 de maio de 2015. O Grupo Provincial do Partido Popular denuncia a existencia de coincidencias entre as persoas contratadas a través do programa Ben Empregado da Deputación de Lugo e membros de listas electorais do PSOE.
Así o fixeron público hoxe dende o Grupo Provincial do Partido Popular tras analizar as persoas que resultaron beneficiarias deste programa financiado con fondos públicos de todos os lucenses. En concreto, os populares enumeraron casos den concellos como Baleira, Láncara, Cervo, O Corgo ou Portomarín, entre outros.
Os populares censuran que o presidente provincial empregue de novo o diñeiro de todos os lucenses para pagar favores políticos a amigos e axentes electorais e use, polo tanto, os fondos dirixidos a emprego para colocar aos seus. Besteiro provoca de novo desigualdades entre os desempregados e xoga coa necesidade dos que buscan un posto de traballo.
Ante esta situación, o Grupo Provincial do Partido Popular anuncia que poñerán este feito en coñecemento da Fiscalía.