Lugo, 04 de abril de 2015.- A voceira do Grupo Provincial do Partido Popular, Elena Candia, criticou esta mañá a mala xestión que a Deputación de Lugo está a facer do servizo de rutas en catamarán durante esta Semana Santa. Situación que, segundo a popular, está a provocar o descontento dos usuarios desprazados ata o embarcadoiro de Doade e que regresan sen poder realizar a ruta en catamarán.
A popular censura que se continúe a dar esta falta de xestión e de planificación por parte da Deputación de Lugo e máis nunha das épocas de maior demanda de turistas do ano e sendo, o servizo de rutas en catamarán, un dos grandes atractivos que ofrece a Ribeira Sacra.
Non funciona a reserva previa de billetes nin habilitan novas rutas
A voceira dos populares explica que dende o mércores non estivo dispoñible o teléfono de reservas de billetes nin tampouco foi posible facer reservas vía internet para estes días (xoves, venres e sábado). Esta situación, segundo matiza Candia, obriga aos interesados a desprazarse ao embarcadoiro para a adquisición dun billete sen a garantía de poder mercalo.
A maiores de non estar permitida a reserva previa, a Deputación de Lugo tampouco duplicou nunha época de gran demanda de turistas o número de rutas e non puxo en funcionamento os dous catamaráns, xa que un deles permanece amarrado no embarcadoiro.
“Son moitos os usuarios que se desprazaron esta Semana Santa ata o embarcadoiro de Doade e que se viron obrigados a regresar ás súas casas sen poder subir no catamarán por falta de praza, mentres un dos barcos está parado. Esta mesma mañá ata 30 persoas permanecen no embarcadoiro á espera dun billete”.
Incumprimento
“Mesmo os veciños durante as reunións para a elaboración do que chaman orzamentos participativos reclamaron melloras neste servizo que seguen a ser desatendidas pola Deputación de Lugo. Castigan á Ribeira Sacra dada a importancia que as rutas en catamaráns teñen para o sector turístico nesta zona”.