A edil de Becerreá María Jesus Roldán Rodríguez será a encargada de asumir a portavocía do Grupo Municipal do Partido Popular de Becerreá, tralo anuncio da retirada, do que ata agora era o voceiro, Antonio González Madarro, por motivos persoais.
A concelleira popular, número tres nas listas electorais das municipais de 2011, recolle esta responsabilidade tras ter o consenso de todo o grupo municipal e co obxectivo de ser, a través do seu partido, a voz dos intereses dos veciños de Becerreá.
Mentres, a viceportavocía do grupo municipal recae no concelleiro Javier Álvarez Fernández. Deste xeito, o reestruturado grupo municipal popular continuará a contribuír a consolidación dun proxecto que é, por méritos propios, alternativa de goberno.
Un proxecto consagrado
O PP de Becerreá foi a forza máis votada nas últimas eleccións xerais de 2011 e nas autonómicas de 2012, e continuará a traballar a prol do deseño dun programa representativo dos veciños de Becerreá que permita o traslado das súas demandas, continuando a ser os intermediarios que os cidadáns demandan.
A fiscalización do goberno municipal xunto coa creación dunha alternativa de goberno son as obrigas que continuarán a asumir dende o reestruturado grupo municipal, que liderado por González Madarro conseguiu ampliar o seu respaldo electoral ata incrementar de 3 a 5 o número de concelleiros populares nas últimas eleccións municipais, tendo hoxe en día o mesmo número de edís que o actual goberno socialista.
En canto á presidencia do PP local, decidirase nos vindeiros meses trala celebración dun congreso local, en cuxa convocatoria están a traballar dende a directiva provincial.