Partido Popular de Lugo

Barreiro: “O goberno que presidente Gómez Besteiro é o máis caro e o menos eficiente da historia da Deputación, seguindo o modelo ZP”

Lugo, a 15 de xullo de 2010.- O Grupo provincial do Partido Popular fixo hoxe balanzo do terceiro ano do goberno bipartito na Deputación que, segundo indicou o seu voceiro, José Manuel Barreiro, segue a caracterizarse pola falla de transparencia na xestión, polo despilfarro e o uso sectario dos fondos, polo retraso na execución de obras fundamentais para a vertebración da provincial e polas posicións encontradas entre os integrantes do bipartito.

Barreiro, quen compareceu acompañado polo resto dos deputados populares, destacou que “o goberno provincial saelle moi caro ós lucense, un custo que cifrou  (incluindo salarios e gastos diversos) en preto de 7 millóns de euros, “para que o final acaben, por exemplo, acometendo este ano obras que xa quedaran adxudicas do anterior goberno provincial”.

A conclusión, por tanto, “é a mesma dos exercicios anteriores: na Deputación traballase moi pouco e o goberno provincial sae moi caro para o ineficaz que resulta. Gasta moitísmo en si mesmo e moi pouco na provincia”. Así, segundo indicou, só a salarios e aplicando xa a rebaixa aprobada no pleno do pasado mes de xuño, adícanse 1.391.322,3 euros ó ano (640.269,49 euros do equipo de goberno e 751.052,9 euros dos seus 27 asesores).

Suliñou, neste senso, que os tres deputados nacionalista, pese a ser partidarios de abolir a administración provincial perciben dela 165.427,73 euros e teñen asignados nove asesores. “Non está mal para non crer nesta institución”, indicou. 

DESPILFARRO. O voceiro dos populares salientou que o despilfarro que caracteriza ó goberno provincial faise máis ostentoso segundo avanza a lexislatura. Así chamou a antención sobre o feito de que a partida adicada a gastos diversos duplicouse con respecto ó pasado ano e suporá “a nada desdeñable cifra de 5.428.293 euros”.

Total ausencia de xestión, descontrol no gasto e falla absoluta de transparencia que é palpable no feito de que, a día de hoxe, por exemplo, aínda non se deron as necesarias explicacións sobre os gravísimos acontecementos acaecidos no seo da institución provincial e que afectan a membros destacados do equipo de goberno como son a vicepresidenta segunda Lara Méndez e o deputado e corresponsable da área de vías e obras Juan José Valiño.

“Aínda estamos a agardar que o presidente José Ramón Gómez Besteiro dé a cara e diga qué está a pasar na Deputación despois de que o prestixio da institución quedara en entredito polas diferentes informacións publicadas nos medios de comunicación tras o levantamento do segredo de sumario da investigación xudicial aberta en Castro de Rei e na que tanto Méndez como Valiño están imputados por delitos moi graves”, engadiu Barreiro.

ENDEBEDAMENTO.- A mala xestión tamén se desprende do alto grao de endebedamento no que se atopa a institución provincial e que, ademais, non se adica precisamente a dar solución ós problemas existentes na provincia porque, de feito, as inversións reais previstas para este ano rebaixáronse un 6 por cento no orzamento consolidado e un 20% se se toma como referencia só a Deputación. Así, dixo que a débeda situase neste momento en 50 millóns de euros, dos que 25,5 millóns foron suscritos este ano, o que, ó seu enteder, “suporá hipotecar o futuro da institución”. 

RETRASO DAS OBRAS.- O voceiro dos populares na Deputación fixo fincapé en que o “oscurantismo e o interese partidista” que impera no goberno provincial ponse de manifesto no retraso que están a acumular as obras que quedaron consignadas do anterior goberno provincial, moitas delas recuperadas agora no plan extraordinario de obras. “Un plan, por certo, sobre o que aínda non se deu información específica sobre os concellos cos que se ían asinar os convenios nin as obras se van a acometer e que ímos coñecendo a medida que se van aprobando nas xuntas de goberno”.

Os populares ven, ademais, un claro favoritismo para os concellos gobernados por socialistas e nacionalista, tanto no que atinxe á financiación de obras como no reparto das subvencións directas de carácter excepcional. Sirva de exemplo que das obras novas adxudicadas en 2009, sen contar POS, canon e a reparación da rede viaria provincial, preto do 95 por cento dos 10,5 millóns consignados a este fin, foron a parar a municipios gobernados por socialistas e/ou nacionalistas. “Unha situación que sospeitamos vaise repetir ó peche do presente exercicio”, engadiu.

XESTIÓN PARTIDISTA. Non hai dúbida, por tanto, ó entender de José Manuel Barreiro de que PSOE e BNG está a empregar a Deputación con fines claramente “partidistas e clientelares” no que naturalmente non prima o interese xeral e menos aínda dar resposta ás necesidades reais dos concellos.

Salientou como exemplo deste “desinterese por promover o densevolvemento da provincia” o pouco que se ten avanzado na construcción dos novos parques industriais proxectados ou a “desatención” na que se atopa o rede viaria provincial.

Ademais, a estas alturas descoñécese o resultado acadado por iniciativas que no seu día publicitáronse amplamente dende a institución provincial, como é o caso da axencia pola enerxía ou o propio pacto provincial polo emprego, que rematará o vindeiro ano e que ten asignado un orzamento total de 3,4 millóns de euros. “Pouco se pode agardar si dos 1,2 millóns que corresponden á presente anualidade, o 23,6% adícase a premios, becas e pensións de estudantes e investigadores e o 38 por cento a gastos diversos”, indicou.

A Deputación bipartita tampouco se caracteriza por ser participativa. De feito, unha das promesas realizadas por José Ramón Gómez Besteiro no seu discurso de investidura, a convocatoria  dunha conferencia de alcaldes e a celebración dun debate sobre o estado da provincia, non se cumpliu en tres anos de goberno.

DESENCONTRO. O voceiro popular tampouco pasou por alto “as continuas desavenencias” das forzas políticas que conforman o goberno provincial. “Foi notoria a diverxencia de concepto sobre o propio funcionamento e utilidade da administración provincial, a xestión do consorcio provincial de bombeiros, o convenio asinado co concello de Barreiros e mesmo sobre outras cuestións de intendencia como pode ser o reparto de axudas para as comunidades veciñais. O BNG abstívose á hora de aprobar as bases reguladoras e non asistiu á reunión da mesa de valoración celebrada recentemente”, explicou.

Uns desencontros do que, ó entender do GPPP, poñen de manifesto que non hai un proxecto común senón un matrimonio de conveniencia, unha coalición de intereses, un mero reparto de competencias e de fondos que cada un aplica pensando exclusivamente no seu respectivo rédito partidista.