Santiago, 5 de marzo de 2010.- O novo Goberno de Galicia comprometeuse en sede parlamentaria a restablecer o servizo de autopsias nos hospitais de Burela e Monforte. Así o explicou o director xeral de Xustiza, Juan Jose Martín Álvarez, en resposta a unha iniciativa do deputado Dámaso López, que foi obxecto de análise na mañá de hoxe na Comisión de Sanidade da Cámara galega.
Desde o Grupo Popular afirman que esta petición vén a demostrar que no PPdeG “sempre mantivemos o mesmo discurso”, antes na oposición e agora desde as responsabilidades de Goberno. “Nós sempre fomos favorables á descentralización da práctica de exames forenses, por entender que a situación contraria provocaba prexuízos ás familias e demoras innecesarias”-explicou Dámaso López.
BOLSA DE EMPREGO PARA A COBERTURA DE VACANTES.- Os populares consideran moi relevante unha das medidas postas en marcha pola Xunta para corrixir esta situación “agora e no futuro”, isto é, a creación dunha bolsa de emprego para a cobertura con médicos interinos das prazas vacantes nos centros hospitalarios lucenses. “Todo iso despois de que estas listas de contratación levasen oito anos baleiras”. De feito, nos hospitais de Burela e Monforte deixaron de realizarse autopsias despois de que os titulares das prazas de medicina legal decidiran darse de baixa no servizo, -tras aprobar o MIR- obrigando á centralización destes exames na capital. En todo caso, e para evitar demoras prolongadas, os responsables actuais do Instituto de Medicina Legal de Galicia decidiron ampliar, tras varios contactos co deputado popular, o horario de práctica das autopsias á tarde, algo extraordinario no conxunto do territorio nacional.
DESCENTRALIZACIÓN DO CONCURSO DE TRASLADOS.- Segundo a explicación ofrecida pola Xunta, estímase que no mes de abril ou maio poda rematar a centralización do servizo en Lugo. Dámaso López felicitase por esta decisión e subliña a coherencia do Partido Popular neste asunto “que criticou a centralización de autopsias cando a levou a cabo o bipartito, e mantén a súa crítica e petición de solucións agora, neste momento, forzando á Xunta a habilitar os mecanismos necesarios para corrixir esta deficiencia”.
SERVIZO DE TRANSPORTE.- En todo caso esta non é a única boa nova ofrecida polo director xeral de Xustiza en resposta a preguntas do Partido Popular, pois tamén adiantou que o Goberno galego promoverá a “comarcalización” do concurso de traslados de cadáveres, que o bipartito centralizou en Lugo. De tal xeito que procederase a dividir a provincia en tres áreas -norte, centro e sur-, e as distintas funerarias poderán presentarse a este concurso en cada unha delas. Unha petición que tamén defendeu o Partido Popular ao longo da pasada lexislatura e que redundará nunha mellora do servizo e nunha rebaixa dos custes e do tempo no transporte.