Santiago, 01 de marzo de 2010.- O voceiro do Mar do Grupo Parlamentario Popular, Jose Manuel Balseiro Orol, vén de saír ao paso das críticas efectuadas pola súa homóloga socialista, Marisol Soneira, ao respecto do desenvolvemento dos proxectos acuícolas en Galicia. Unha vez máis o PSOE amosa a súa “obsesión case enfermiza” en contra do proxecto de instalación dunha piscifactoría en Cabo Touriñán (Muxía). A estratexia socialista ten por obxecto, segundo os populares, “criminalizar unha empresa galega, algo que fixeron desde o Goberno e, o que é inaudito seguen a facer desde a oposición”. Balseiro Orol cree que no PSOE tendrán que explicar aos veciños por que están en contra dun proxecto que contribuiría a xerar un bo número de postos de traballo e atraer riqueza nun momento de crise que afecta especialmente á Costa da Morte e, sobre todo, queren que os socialistas dean conta de cales son os motivos reais, “tan escuros e difusos”, polos que desde a Xunta bipartita paralizaron un proxecto que tiña todos os permisos en regra, freando polo tanto un importantísimo investimento que marchou cara Portugal.
Balseiro Orol tamén referiuse á expropiación dunha serie de terreos no concello de Xove (Lugo) para a ampliación dunha piscifactoría alí emprazada, neste senso explicou que “esta decisión se adopta conforme ao previsto polo anterior Goberno bipartito, xa que foi no plan que eles elaboraron e por continuar os seus trámites polo que se está a empregar o procedemento expropiatorio”. Desde o Grupo Popular aclaran que o novo Plan de Acuicultura, o revisado polos responsables da Xunta actual, converte nun mecanismo excepcional a expropiación, “pois antes prima o acordo cos propietarios dos terreos” mentres que para a Xunta bipartita era a regra xeral. Precisamente este cambio foi un dos compromisos electorais do PPdeG, ao entender que o réxime expropiatorio como norma xeral era lesivo para os intereses dos veciños, modificación que a Consellería do Mar cumpriu con efectividade.
A PARÁLISE ACUÍCOLA COMO HERDANZA DO BIPARTITO.- Finalmente o voceiro do Mar dos populares galegos amosou a súa total sorpresa porque sexa o PSOE o que acuse á Xunta actual de paralizar o desenvolvemento acuícola cando foron eles, durante os catro últimos anos de Goberno, os que se viron incapaces de impulsar unha soa piscifactoría nova. A diferenza disto, o Executivo que lidera Alberto Núñez Feijoo deu a primeira axuda para levar adiante un proxecto acuícola en Galicia desbloqueando unha situación insostible que constituía a peor herdanza do bipartito.
Segundo Balseiro Orol, o PSOE estaría a empregar contra a Xunta adxectivos que máis ben servirían para cualificar a xestión dos socialistas ao fronte da antiga Consellería de Pesca, pois foron eles quen, na responsabilidade de Goberno se deixaron levar pola especulación e polo amiguismo, intereses moi distintos dos xerais de todos os galegos, convertendo a pasada nunha lexislatura perdida para a o desenvolvemento da industria acuícola en Galicia.