Trala reunión do comité de dirección do partido celebrado en Chantada, Rueda indicou que un dos temas abordados no encontro foi o da Lei de caixas e subliñou que o secretario de Estado de Cooperación Territorial, Gaspar Zarrías, mantén cara á normativa galega das caixas o talante político do socialismo andaluz que xa no seu día amosou a ex ministra Magdalena Álvarez e que se basea en que todo o que sexa bó para a nosa Comunidade non é bo para o Goberno central socialista.

Por este motivo, segundo Alfonso Rueda, o Executivo de Zapatero castiga a Galicia poñendo de xeonllos o noso sistema financeiro ante outras comunidades e paralizando normas propias de Galicia que, por outra banda, si avala cando veñen de parlamentos “amigos” coma o catalán ou o andaluz.

O dirixente popular cre que o Goberno socialista de Madrid pretende lesionar as competencias de Galicia e que minimiza a súa capacidade de autogoberno, recollida no Estatuto de Autonomía da Comunidade, coa fin de fortalecer financeiramente a autonomías que compartan cores políticas co Goberno de Zapatero.

Por iso, segundo Rueda, o comité de dirección do PPdeG coincidiu en valorar positivamente a decisión do Parlamento galego de dirixirse ao Tribunal Constitucional para defender a constitucionalidade dunha norma avalada polos servizos xurídicos da Cámara galega. Neste sentido, engadiu que os populares manteñen viva a vía política pero, se Madrid non quixese negociar, non eludirían unha posible vía xudicial no Tribunal Constitucional a través dalgún tipo de recurso.

Rueda considera evidente que o equipo de Zapatero endureceu a súa postura con Galicia ao longo das semanas xa que pasaron de falar dun recurso xurídico a presentar un recurso político, de convocar negociacións no Ministerio a negarlle á Xunta a posibilidade dunha reunión para falar do futuro financeiro galego e pasaron da cordialidade das chamadas telefónicas á frialdade da correspondencia. Así mesmo, para o popular tampouco pasou desapercibido o cambio das cartas sobrias ás misivas provocativas nas que o Goberno central incluso recorreu á austeridade para xustificar que non queiran recibir á Xunta en Madrid.

Nesta liña, Rueda indicou que ese cambio de actitude pode deberse a que o Goberno central busca que Galicia non poida facer sombra a outros territorios que este quere protexer e potenciar. Segundo o popular, Galicia é máis forte con caixas que sen elas, e é na segunda desas situacións na que o Goberno central se afana.